Opinber heimsókn forseta Íslands og forsetafrúar í Norðurþing
Guðni forseti og Eliza Reid í heimsókn í Þórshöfn. Reyndar ekki Þórshöfn á Langanesi heldur í Færeyjum. Mynd: forseti.is
Forseti Íslands Guðni Th. Jóhannesson og frú Eliza Reid halda í opinbera heimsókn í Norðurþing á morgun, miðvikudaginn 18. október og fimmtudaginn 19. október næstkomandi. Forsetahjónin munu heimsækja skóla, heilbrigðisstofnanir, býli og fyrirtæki í sveitarfélaginu þessa tvo daga og boðið verður til Fjölskylduhátíðar í Íþróttahöllinni á Húsavík að kvöldi miðvikudagsins.
Dagskrá heimsóknarinnar hefst að Hveravöllum í Reykjahverfi kl. 08:30 að morgni 18. október þar sem forsetahjón munu kynna sér vistvæna ræktun grænmetis. Þaðan verður haldið til Húsavíkur að leikskólanum Grænuvöllum þar sem Sigríður Valdís Sæbjörnsdóttir leikskólastjóri, nemendur og starfsfólk taka á móti gestum kl. 09:30. Frá Grænuvöllum liggur leiðin í Skrúðgarðinn, sem Kvenfélagið á Húsavík hefur átt veg og vanda að, og síðan í Borgarhólsskóla. Þórgunnur Reykjalín Vigfúsdóttir skólastjóri, nemendur og starfsfólk kynna forsetahjónum starf skólans og síðan snæða þau hádegisverð með yngri nemendum.
Í hádeginu ávarpar forseti nemendur Framhaldsskólans á Húsavík og svarar fyrirspurnum þeirra auk þess sem nemendur bjóða gestum upp á tónlist. Eftir að forsetahjón hafa kynnt sér fyrirhugaðar framkvæmdir við sjóböð á Húsavíkurhöfða liggur leiðin í Stjórnsýsluhúsið á Húsavík þar sem sveitarstjórnarfólk kynnir þeim helstu stoðir samfélagsins, áskoranir og framtíðarsýn. Forsetahjón hitta síðan eldri borgara í Dvalar- og hjúkrunarheimilinu Hvammi um kl. 13:45 og halda í kjölfarið að Safnahúsinu á Húsavík þar sem skoðaðar verða helstu sýningar undir leiðsögn Sifjar Jóhannesdóttur forstöðumanns. Eftir heimsókn í Húsavíkurkirkju verður litið inn í Helguskúr við Húsavíkurhöfn þar sem spjallað verður við þá sem þar ráða ríkjum.
Kl. 16:00 opnar forseti Íslands formlega nýja sýningu í Hvalasafninu og að því loknu verður efnt til málþings um horfur í ferðaþjónustu á svæðinu með þátttöku nokkurra helstu aðila í greininni. Í kjölfarið heimsækja forsetahjónin síðan Könnunarsögusafnið á Húsavík.
Dagskrá fyrri heimsóknardags forsetahjóna til Norðurþings lýkur með Fjölskylduhátíð í Íþróttahöllinni sem hefst kl. 20:00. Hátíðin er öllum opin.
Að morgni fimmtudagsins 19. október halda forsetahjón fyrst að Lóni í Kelduhverfi þar sem bændur kynna búskapinn. Um kl. 09:20 koma forsetahjón í Grunnskólann í Lundi og ræða þar við nemendur og starfsfólk. Eftir stutta heimsókn að Skinnastað liggur leiðin til Raufarhafnar. Forsetahjón heimsækja Grunnskólann um kl. 11:00, skoða framkvæmdir við Heimskautsgerðið með Jónasi Friðrik og Svövu Árnadóttur og snæða síðan hádegisverð á Hótel Norðurljósum. Eftir hádegi heimsækja forsetahjón GPG fiskverkun á Raufarhöfn og ræða að því loknu við eldri borgara staðarins í Breiðabliki um kl. 13:30.
Frá Raufarhöfn verður haldið að kjötvinnslustöðinni Fjallalambi á Kópaskeri, starfsemin skoðuð og rætt við starfsfólk. Eftir heimsókn í Stóru-Mörk, félagsmiðstöð aldraðra á Kópaskeri, lýkur heimsókn forsetahjóna til Norðurþings við Ásbyrgi. JS
Nýjast
-
Vátryggingafélag Íslands (Skagi) kaupir Íslensk verðbréf
Vátryggingafélag Íslands hf. (Skagi) hefur undirritað kaupsamning við hluthafa Íslenskra verðbréfa hf. (ÍV) um kaup Skaga á 97,07% hlutafjár í félaginu. Horft er til þess að í kjölfarið verði farið í kaup hlutafjár annarra hluthafa þannig að Skagi verði einn eigandi alls hlutafjár í Íslenskum verðbréfum. Kaupverð 97,07% hlutafjár í Íslenskum verðbréfum er 1.598 milljónir króna. Gert er ráð fyrir að kaupverðið verði greitt með reiðufé, en Skagi hefur val um að greiða allt að fjórðungi kaupverðsins með afhendingu nýs hlutafjár í Skaga. Fyrirtækjaráðgjöf og sérhæfðar fjárfestingar eru undanskilin í kaupunum. Jóhann M. Ólafsson, forstjóri ÍV, hefur stigið til hliðar og Jón Helgi Pétursson, framkvæmdastjóri ÍV sjóða, hefur tekið tímabundið við sem forstjóri félagsins. -
Amtsbókasafnið - Býður garðverkfæri í útlán
Áður hefur verið haft á orði á þessum vef að starfsfólkið á Amtinu hér í bæ sé skemmtilega ferskt og fái líflegar hugmyndir sem notendur safnsins kunna vel að meta. Í frétt frá þeim í dag er sagt frá að nú sé hægt að fá garðverkfæri, takk fyrir takk, að láni hjá Amtsbókasafninu! Kæru safngestir! NÝJUNG! - Við erum farin að bjóða upp á garðverkfæri til útláns! Það er farið að vora á Akureyri og kominn tími til að byrja vorverkin. Frá og með deginum í dag eru garðverkfæri til útláns hjá okkur, lánstími er 7 dagar. Verkfæri sem eru í boði: handskófla, lítil klóra, stungugaffall, stunguskófla, kantskeri, handklippur, greinaklippur, fata, beðhrífa, fíflajárn, greinasög og garðáhöld fyrir börn. Vinsamlegast þrifið verkfærin vel áður en þið skilið. -
Dýrahræ fundust á víðavangi við Línuveg á Húsavík
Steingrímur Hallur Lund rak í rogastans á dögunum þegar hann var úti að viðra hundinn sinn úti á Bakka við Línuveg í landi Húsavíkur. Hann var ekki komin langt frá veginum þegar hann gekk fram á dauða rollu, sem búið var að klippa af eyrun. Skammt undan gekk hann svo fram á fimm selshræ. -
Krían komin til Grímseyjar
Fyrstu kríurnar þetta árið í Grímsey sáust um helgina. Varpið þar er með stærri kríubyggðum á landinu og er talið að þar verpi þúsundir para. Litlar rannsóknir hafa verið gerðar á breytingum kríuvarpa frá ári til árs en margt bendir til fækkunar víða á landinu frá því um aldamót, einnig hefur orðið vart við sömu þróun í nágrannalöndum okkar. -
Úrskurðaður í fjögurra vikna gæsluvarðhald
Rannsókn á máli þar sem fimmtug kona fannst látin á heimili sínu þann 22. apríl síðastliðinn miðar vel. -
HSN - Ekki óútskýrður kynbundin launamunur
„Það er ánægjulegt að greina frá því að ekki hefur greinst óútskýrður kynbundin launamunur í launagreiningum HSN enda kyn hreint ekki áhrifabreyta á árangur fólks í starfi,“ segir á heimasíðu Heilbrigðisstofnunar Norðurlands eystra, en HSN fékk endurnýjun á Jafnlaunavottun á dögunum. -
Börn og ungmenni í Hrísey vilja gervigrasvöll
Börn og ungmenni í Hrísey hafa lengi kallað eftir því að fá gervigrasvöll á skólalóðina sína líkt og er hjá öllum öðrum grunnskólum í sveitarfélaginu. Málið var rætt á bæjarstjórnarfundi unga fólksins á dögunum. -
Tökum höndum saman og hreinsum bæinn eftir veturinn
Vorhreinsun sveitarfélagsins er í fullum gangi. Opin svæði eru hreinsuð ásamt því að götur, gangstéttar og stígar eru sópaðir og þvegið er af miklum krafti. -
Kynning - Dagar stækka við sig á Norðurlandi
Fyrirtækið Dagar, sem sérhæfir sig í ræstingum, fasteignaumsjón og vinnustaðalausnum, flutti nýverið í stærra húsnæði að Furuvöllum 7. Dagar eru framsækið en rótgróið fyrirtæki þar sem starfa tæplega 800 manns og starfsstöðvar eru á þremur stöðum á landinu; í Garðabæ, á Selfossi og á Akureyri.
Athugasemdir