Bókin Svarfdælasýsl er komin út
„Við vorum að fá bókina í hendur og ég verð að segja að ég er mjög ánægður með útkomuna. Þetta er efnismikil bók upp á um 550 blaðsíður og með um 500 ljósmyndir, sem fæstar hafa birst áður opinberlega. Vinnsla bókarinnr hefur verið skemmtilegt hliðarverkefni undanfarin þrjú ár og það er ánægjulegt að sjá ávöxt slíkrar vinnu,“ segir Óskar Þór Halldórsson, aðalhöfundur bókarinnar Svarfdælasýsl sem kom út í gær, 12. október.
Auk hans skrifar bróðir hans, Atli Rúnar, hluta texta bókarinnar, sem var kynnt í útgáfuhófi í Bergi á Dalvík í gærkvöld og í kvöld, föstudag í Norðurslóðasetrinu við Strandgötu á Akureyri kl. 17:00 og þriðja útgáfuhófið verður í Salnum í Kópavogi um aðra helgi, laugardaginn 21. október, kl. 16:00. Allir eru velkomir í þessi þrjú útgáfuhóf sem útgefandi bókarinnar, Svarfdælasýsl forlag sf., stendur fyrir en það settu Óskar Þór, Atli Rúnar og fjögur systkini þeirra frá Jarðbrú í Svarfaðardal, á stofn í því skyni að gefa bókina út. „Vissulega er óvenjulegt að systkini standi að slíkri bókaútgáfu en við ákváðum bara að gera þetta sjálf frá a til ö. Þetta hefur verið mjög skemmtilegt og gefandi fjölskylduverkefni,“ segir Óskar Þór.
Viðamikil bók
Eins og nafn bókarinnar gefur til kynna tengist umfjöllunarefni hennar heimasveit Jarðbrúarsystkinanna, Svarfaðardal. „Þetta byrjaði allt saman sem eilítið grúsk af minni hálfu fyrir þremur árum eða svo og sannast sagna var aldrei inni í myndinni að það grúsk leiddi af sér viðamikla bók. En svona geta hlutirnir þróast á skemmtilegan hátt,“ rifjar Óskar Þór upp.
Þrír aðalkaflar eru í bókinni, í fyrsta lagi er fjallað er um Göngustaðasystkinin svokölluðu, sem kennd voru við Göngustaði í Svarfaðardal og sum urðu goðsagnir í lifanda lífi. „Amma okkar á Jarðbrú var ein þessara sjö systkina og í bókinni er saga hennar og sex systkina hennar sögð og stuðst í frásögninni við bæði skriflegar og munnlegar heimildir fjölda fólk. Þarna er sögð saga fólks í gleði og sorg sem fæddist undir lok nítjándu aldar og á fyrstu árum þeirrar tuttugustu. Áhugaverð saga alþýðufólks, vil ég segja, og ýmislegt mun koma fólki á óvart.“
Annar kafli bókarinnar fjallar um aðdraganda og gerð kvikmyndarinnar Lands og sona, sem var tekin upp í Svarfaðardal kuldasumarið 1979. Varpað er ljósi á ýmislegt við gerð myndarinnar sem ekki hefur áður komið fram.
„Land og synir var og er stórmerkileg mynd og hefur ákveðinn sess í íslenskri kvikmyndasögu. Margir segja að hún hafi markað upphaf íslenska kvikmyndavorsins og öll þekkum við þá grósku í íslenskri kvikmyndagerð sem hefur fylgt í kjölfarið,“ segir Óskar Þór.
Umfjöllunarefni þriðja aðalkafla bókarinnar er Húsabakkaskóli, sem starfaði í fimmtíu ár, frá 1955 til 2005. Skólinn var miðdepill eða hjarta Svarfaðardals í þá fimm áratugi sem skólinn starfaði og á sér merka sögu sem hér er sögð í fyrsta skipti. Mikill fjöldi merkra mynda úr einkasöfnum birtast með umfjölluninni.
Byggt á munnlegum og rituðum heimildum
„Þessi bók er byggð á rituðum heimildum en þó miklu meira á munnlegum heimildum – viðtölum við mikinn fjölda fólks sem var fúst að veita okkur allar þær upplýsingar sem það býr yfir og komu okkur að gagni. Við höfum kallað þessa vinnu okkar blaðamannasagnfræði til aðgreiningar frá heimildavinnu sagnfræðinga sem þeir auðvitað vinna samkvæmt kúnstarinnar reglum. Við leggjum áherslu á lifandi og skemmtilega frásögn og í því skyni birtum við mörg áhugaverð viðtöl sem við höfum tekið,“ segir Óskar Þór
Þó svo að um 500 myndir séu í bókinni – í öllum þremur meginköflunum - eru fjölmargar ljósmyndir sem út af stóðu. Allar þessar myndir er hægt að sjá á undirvef á vefnum svarfaelasysl.com og þar er einnig hægt að kaupa bókina. „Bókin verður fyrsta lagi seld í þessum þremur útgáfuhófum, í öðru lagi munum við systkinin verða með hana til sölu, hana verður hægt að panta á vefnum svarfdaelasysl.com og einnig verður hún fáanleg í Pennanum– Eymundsson,“ segir Óskar Þór Halldórsson.
Nýjast
-
Þjónustunefnd AA leitar að framtíðarhúsnæði
Brýnt er að ráðast í gagngerar endurbætur á húsinu að Strandgötu 21 þar sem AA-samtökin á Akureyri hafa haft aðstöðu sína um langt árabil. -
Hitaveitur þarfnast athygli
Norðurorka rekur hitaveitu í Ólafsfirði og Reykjaveitu í Fnjóskadal auk hitaveitu á Akureyri og nágrannabyggðum. Þær veitur þarfnast athygli að því er fram kom í máli Eyþórs Björnsson forstjóra Norðurorku á aðalfundi félagsins. -
Hængsmenn afhentu bíl og héldu Hængsmót
Lionsklúbburinn Hængur á Akureyri hélt um liðna helgi árlegt Hængsmót fyrir fatlaða í 41. Skipti. Mótið fór fram í Íþróttahöllinni og í ár var keppt í boccia en mótið var auk þess Íslandsmót í greininni. -
Sýning ársins 2024 opnuð á Sigurhæðum
Á mæðradaginn, sunnudaginn 12. maí klukkan 13 opnar Sýning ársins 2024 í Menningarhúsi í Sigurhæðum á Akureyri. Lilja Alfreðsdóttir, menningar- og viðskiptaráðherra, flytur ávarp á opnuninni. Húsið verður opið til klukkan 17 þennan sunnudag og það verður líka hægt að líta inn á vinnustofur listafólks, hönnuða og hugsuða á annarri hæð Sigurhæða. -
Vátryggingafélag Íslands (Skagi) kaupir Íslensk verðbréf
Vátryggingafélag Íslands hf. (Skagi) hefur undirritað kaupsamning við hluthafa Íslenskra verðbréfa hf. (ÍV) um kaup Skaga á 97,07% hlutafjár í félaginu. Horft er til þess að í kjölfarið verði farið í kaup hlutafjár annarra hluthafa þannig að Skagi verði einn eigandi alls hlutafjár í Íslenskum verðbréfum. Kaupverð 97,07% hlutafjár í Íslenskum verðbréfum er 1.598 milljónir króna. Gert er ráð fyrir að kaupverðið verði greitt með reiðufé, en Skagi hefur val um að greiða allt að fjórðungi kaupverðsins með afhendingu nýs hlutafjár í Skaga. Fyrirtækjaráðgjöf og sérhæfðar fjárfestingar eru undanskilin í kaupunum. Jóhann M. Ólafsson, forstjóri ÍV, hefur stigið til hliðar og Jón Helgi Pétursson, framkvæmdastjóri ÍV sjóða, hefur tekið tímabundið við sem forstjóri félagsins. -
Amtsbókasafnið - Býður garðverkfæri í útlán
Áður hefur verið haft á orði á þessum vef að starfsfólkið á Amtinu hér í bæ sé skemmtilega ferskt og fái líflegar hugmyndir sem notendur safnsins kunna vel að meta. Í frétt frá þeim í dag er sagt frá að nú sé hægt að fá garðverkfæri, takk fyrir takk, að láni hjá Amtsbókasafninu! Kæru safngestir! NÝJUNG! - Við erum farin að bjóða upp á garðverkfæri til útláns! Það er farið að vora á Akureyri og kominn tími til að byrja vorverkin. Frá og með deginum í dag eru garðverkfæri til útláns hjá okkur, lánstími er 7 dagar. Verkfæri sem eru í boði: handskófla, lítil klóra, stungugaffall, stunguskófla, kantskeri, handklippur, greinaklippur, fata, beðhrífa, fíflajárn, greinasög og garðáhöld fyrir börn. Vinsamlegast þrifið verkfærin vel áður en þið skilið. -
Dýrahræ fundust á víðavangi við Línuveg á Húsavík
Steingrímur Hallur Lund rak í rogastans á dögunum þegar hann var úti að viðra hundinn sinn úti á Bakka við Línuveg í landi Húsavíkur. Hann var ekki komin langt frá veginum þegar hann gekk fram á dauða rollu, sem búið var að klippa af eyrun. Skammt undan gekk hann svo fram á fimm selshræ. -
Krían komin til Grímseyjar
Fyrstu kríurnar þetta árið í Grímsey sáust um helgina. Varpið þar er með stærri kríubyggðum á landinu og er talið að þar verpi þúsundir para. Litlar rannsóknir hafa verið gerðar á breytingum kríuvarpa frá ári til árs en margt bendir til fækkunar víða á landinu frá því um aldamót, einnig hefur orðið vart við sömu þróun í nágrannalöndum okkar. -
Úrskurðaður í fjögurra vikna gæsluvarðhald
Rannsókn á máli þar sem fimmtug kona fannst látin á heimili sínu þann 22. apríl síðastliðinn miðar vel.
Athugasemdir