Toppleikur listaskáldsins góða!

Jónas Hallgrímsson, skytta og skotfæraframleiðandi. JS
Jónas Hallgrímsson, skytta og skotfæraframleiðandi. JS

Jónas Hallgrímsson, rjúpnaskytta og knattspyrnukappi á Húsavík, er ólíkindatól og kemur gjarnan með afar óvæntar vendingar í ýmsum málum. Hann var eitt sinn spurður hver væri eftirminnilegasti leikur hans með Völsungi og svarið var ekki einhver stórkostlegur sigurleikur þar sem Jenni skoraði þrennu, heldur 6-0 tapleikur gegn Fram! Gerðist Jónas afar mývetnskur í mati sínu á þessum mikla og eftirminnilega ósigri:

„Við spiluðum þá sundur og saman. Við vorum alveg svakalega góðir og þó voru þeir náttúrulega með allar landsliðsstjörnurnar, Pétur Ormslev og fleiri. Beggi Olgeirs varð brjálaður og var rekinn útaf og við töpuðum þessum leik. Þeir voru með gott lið og fullt af áhorfendum en þeir áttu bara ekki séns í okkur, því við vorum alveg hryllilega góðir á þessum tíma.“

Sagði „listaskáldið góða,“ Jónas Hallgrímsson, um 6-0 tapleikinn gegn Fram. JS


Nýjast