Nýr Vikudagur

Nýr Vikudagur er komin út. Þar má að venju finna lesefni af ýmsu tagi.

Júlia Þrastardóttir gullsmiður er að hanna nýjan skúfhólk sem ætlaður er til hversdagsbrúks og verður á viðráðanlegu verði. Starfsmenn Fab Lab á Akureyri munu þrívíddarprenta skúfhólkinn á Handverkshátíð á Hrafnagili í ágúst þannig að gestir geta fylgst með hvernig hann verður til. Júlía rekur gullsmíðaverkstæðið djúls við Tryggvabraut á Akureyri.

Uppgangur í fiskeldi hér á landi hefur í för með sér að mikið er að gera við framleiðslu á fiskafóðri hjá Fóðurverksmiðjunni Laxá. Þar á bæ sjá menn fyrir sér að fullnýta afkastagetu verksmiðjunnar, framleiða um 20 þúsund tonn á ári, á næsta áratug eða svo.

Útsvarstekjur Akureyrarbæjar eru töluvert hærri en áætlanir gerðu ráð fyrir. Það þýðir að bærinn er að fá um 80 milljónir meira í kassinn, sem vitanlega er jákvætt.

Framkvæmdir standa yfir við nýja hreinsistöð á landfyllingu við Sandgerðisbót sem ætlunin er að taka í notkun vorið 2020. Með tilkomu hennar verður strandlengjan við Akureyri hrein og fín.

Ferðaskrifstofa Akureyrar, í samstarfi við bresku ferðaskrifstofuna Superbreak, hefur hafið sölu á flugferðum beint frá Akureyrarflugvelli til Bretlands. Heimamenn taka beinu flugi frá Akureyri fagnandi.

Norðurslóðasetrið hefur verið útnefnt sem besta nýja safnið á Norðurlandi og þar á bæ eru menn stoltir.

Um 400 manns koma á Atmstbókasafnið á Akureyri á hverjum degi, sem er dágóður slatti, en um tíðina hefur gestakomum heldur fækkað og útlán hafa dregist saman. Miðað við það sem áður var. Spjallað er við Hólmkel Hreinsson amtsbókavörð í nýjum Vikudegi.

Eggert H. Sigmundsson býður upp á mikla veislu í matarhorni og fjallað er um húsið númer 17 við Norðurgötu í þættinum Húsin í bænum.


Nýjast