Handbók um læsiskennslu

Rósa Eggertsdóttir.
Rósa Eggertsdóttir.

Bókin Hið ljúfa læsi, handbók um læsikennslu fyrir kennara og kennaranema, var nýlega gefin út en bókin er eftir Rósu Eggertsdóttur og fjallar um læsi og læsiskennslu í 1.–10. bekk. Við ritun bókarinnar var leitað í smiðju fjölda erlendra fræðimanna sem hafa rannsakað árangursríka læsiskennslu.

Leitast er við að kynna hagnýtar leiðir í kennslu sem taka mið af þessum rannsóknum. Inn í læsiskennslu fléttast námsaðlögun, samvinnunám, samræða í námi, félagastuðningur, áætlanagerð, sjálfstæð vinnubrögð og athafnamiðað nám. Tveir kaflanna fjalla um Byrjendalæsi og Fluglæsi sem kynnt er í fyrsta sinn. Bókin er alls 510 blaðsíður, þar af 240 síður innbundnar og 270 síður á minnislykli.

Bókin nýtist foreldrum vel

Rósa Eggertsdóttir hefur unnið að framgangi læsis í fjölda ára í samvinnu við fjölmarga skóla víða um land, fyrst sem deildarstjóri á Fræðsluskrifstofu Norðurlands eystra og deildarstjóri hjá Skólaþjónustu Eyþings og sem sérfræðingur hjá Miðstöð skólaþróunar við Háskólann á Akureyri um 14 ára skeið. Hún hefur haft umsjón með þróunarverkefnum um læsi í skólum, haldið námskeið og flutt erindi á ráðstefnum, samið námsefni og próf, skrifað skýrslur og birt fræðilegt efni um læsi og leshömlun.

Þá segir í tilkynningu að þótt bókin sé skrifuð með kennara og kennaraefni í huga, geti hún vel nýst foreldrum sem vilja styðja við læsisnám barna og unglinga. Hið ljúfa læsifæst í Bóksölu stúdenta, Bóksölu kennaranema, Vefsölu A4 og Pennanum–Eymundsson í Austurstræti og á Akureyri.

 

 


Nýjast